carta de pesquisa

«Dessaguissadas cosas ffazen los omnes muchas vegadas ssobre que á el rrey mandar ffazer pesquisa assí commo quando rroban o quebrantan caminos o eglesias o ffuerçan mugieres o ffazen algunas de las otras cosas que dize en el título de las pesquisas, ssobre que manda el rrey por ssus cartas que lo pesquieran, o manda que rrecabden a aquellos de quien querellaren de guisa que parezcan antél; mas ssi ffuere para ffazer pesquissa, deue sseer ffecha en esta guisa: Del rrey a aquellos a qui manda ffazer la pesquissa, cómmo les ffaze ssaber que ssobre querella quel ffizo tal omne de tal ffecho malo quel ffezieron o ssobre abenençia que ffezieron de contienda que auíen entre ssí, de que piden merççed al rrey que lo ssepa por pesquissa, o ssobre algunas otras cosas que ffezieron al rrey entender que lo manda él pesquerir de ssuyo» (Espéculo, 4.12.32). «Como deuen ser fechas las cartas que el rey enbia a algunos quando les manda fazer la pesquisa o que recabden algunos malfechores. Desaguisadas cosas fazen los onbres muchas vegadas sobre que ha el rey de mandar fazer pesquisas, asi commo quando roban o quebrantan yglesias o caminos o fuerçan mugeres o fazen algunas de las otras cosas que dize en el titulo de las pesquisas sobre que manda el rey por sus cartas que los pesquieran, o que manda que recabden aquellos de quien contrallaren de guisa que parezcan ante el, mas si fuere para fazer la pesquisa, commo les faze saber que sobre querella que le fizo tal onbre de tal fecho malo que fizieron, o sobre abenençia que le fizieron de contienda que auian entre si de que piden merçed al rey que sepa la verdad por pesquisa o sobre algunas otras cosas que fizieron al rey entender que lo mande el pesquerir de suyo, e commo el rey manda que aquellos a que los pesqueridores demandaren la verdad que ge la digan e los que dixieren que lo vieron que digan commo lo vieron e los que lo oyeron, que digan commo lo oyeron e los que lo creen que digan commo lo creen, e que les digan tal verdad que el rey no falle despues y el contrario E que si de otra guisa fiziesen que a ellos se tornaria por ello. E la pesquisa que fizieren que manda el rey que ge la enbie escripta en su carta çerrada e sellada con sus sellos» (P 3, 18, 24).