carta de oficio

«Quánto deuen dar los rricos omnes o otros omnes qualesquier por las cartas que les dan en la chançellería quando el rrey les pone tierra. Ricos omnes quando les pone el rrey tierra o quando ffaze alfférez o mayordomo o merino o alcalle, deuen dar tanto por las cartas a la chançellería, commo dize en esta ley. Onde dezimos que quando el rrey possiere marauedís en tierra de nueuo a algún rrico omne o a otro qualquier que los ponga, que deue dar por la carta de çera de çient marauedís, tres marauedís a la chançellería, vna vez a la entrada de la tierra e non más. E quando ffeziere alfférez o mayordomo, que dé cada vno dozientos marauedís a la chançellería; e quando ffezier chançeller, que dé quinientos marauedís; e quando ffeziere notario mayor o merino mayor en ssu tierra o almirante mayor en ssu tierra, que dé cada vno dozientos marauedís; e quando ffezier alguacil de ssu casa, que dé treynta marauedís […] quando ffezier copero mayor o ponero o rrepostero o despenssero, que dé cada vno dellos quarenta marauedís; e quando ffezier cozinero mayor o çatiquero o cauallerizo o possadero o çeuadero, que dé otrossí cada vno destos veynte marauedís, e quando el mayordomo mayor metiere otro en ssu logar, que de veynte marauedís, aquel que possiere; e quando ffeziere a alguno alcalle o iuez o merino de alguna villa o de alguna merindat, ssi merino mayor y non ouiere, que dé cada vno destos diez marauedís; e quando ffeziere escriuano de conçeio o entregadorque entregue las debdas de los iudíos, que dé cada vno destos çiento marauedís; e quando ffeziere rrabí de alguna grant tierra, deue dar dozientos marauedís; e quando ffeziere almoxariffes en las grandes villas, que dé cada vno dellos çiento marauedís, e quando ffeziere almoxariffes en las menores villas que dé cada vno çinquenta marauedís, e quando ffeziere vieio mayor que es ssegunt los iudíos e los moros commo adelantado el pussiere ssobre alguna tierra para oyr las alçadas e para librar los pleitos, deue dar atal commo este çiento marauedís, mas ssil pussiere en alguna aliama ssenalada, dé veynte marauedís» (Espéculo, 4.12.55).